Фотаальбом “Беларусь. Погляд праз стагоддзі” запрашае ў захапляльнае падарожжа па Беларусі пры дапамозе малюнкаў Напалеона Орды – выдатнага папулярызатара айчыннай матэрыяльнай і духоўнай спадчыны – і ілюстрацый фотамастака Сяргея Плыткевіча.

Фотаальбом у цвёрдай вокладцы, 156 старонак. На беларускай мове. Канцэпцыя і фота: Сяргей Плыткевіч. Тэкст: Таццяна Хвагіна. Дызайн: Л. Карчажынская. 2025 год.

Ідэя альбома, у якой побач з малюнкамі Н. Орды змешчаны сучасныя фотаздымкі гэтых самых мясцінаў, нарадзілася ў Сяргея Плыткевіча ў пачатку 2023 года. Як сцвярджае сам аўтар, спецыяльныя здымкі не праводзіліся – усе аб’екты, намаляваныя Напалеонам Ордай, здымаліся Сяргеем Плыткевічам раней. Ён проста перагледзеў свой вялікі фотаархіў і адабраў неабходныя сюжэты.

Новы час дае новыя магчымасці. Напалеон Орда маляваў алоўкам і пэндзлем, а ў распараджэнні фотамастака Сяргея Плыткевіча шмат сучасных сродкаў: фотаапараты, будаўнічыя вышкі, верталёты і самалёты, квадракопцер. Адсюль і погляд з вышыні птушынага палету, і іншыя незвычайныя ракурсы. Яго ўласны архіў вельмі змястоўны – тысячы фотаздымкаў розных куткоў краіны, таму што за апошнюю чвэрць стагоддзя ён наведаў і засняў мноства цікавых мясцін Беларусі.

Сапраўды, творчасць Напалеона Орды натхняе і служыць прыкладам. Гэты альбом таксама кліча ў дарогу мастакоў, краязнаўцаў і іншых аматараў падарожжаў па родным краі. Ён – нібы прызнанне ў любові да сваёй Радзімы, якое адчуваецца на кожнай старонцы, і хочацца верыць – працяг будзе!