З прадмовы аўтара да альбома:
«Ранішняя раса, туман… Сонечная дарожка на люстры возера, рух ракі… Бляск ручая, дождж за акном і першы снег… Смак вады з прыгаршчаў… Момант, калі перапыняеш дыханне, а вусны нецярпліва дакранаюцца да паверхні крыніцы… Неспакой, з якім зазіраеш у блакітныя вочы дзяўчыны… Гэтыя вобразы-сімвалы ведае кожны. Пры ўзгадцы пра іх з’яўляецца пачуццё шчасця. Свядомасць зрушвае крыгаход мараў і ўспамінаў. Плынь думак і фантазіі пераносіць у час дзяцінства і маладосці, туды, дзе ёсць нешта сваё. Там, дзе купаўся, сплаўляўся з сябрамі на байдарках, лавіў рыбу, катаўся на лодцы з каханым чалавекам. Мроіцца дзядоўская хата са студняю ў двары. Лецішча з невялічкай сажалкай… Вобразы, існаванне якіх немагчымае без аднаго важнага складніка — вады. Той, што віруе і ласкава плёскаецца ў непаўторных творах Бога на зямлі — іх хараству і прысвечана гэтая кніга».

Старонкі адной кнігі робяць магчымым унікальнае падарожжа за «блакітным скарбам». 305 фотаздымкаў, зробленых з зямлі, вады і нават з паветра, паказваюць аблічча вядомых і схаваных ад погляду чалавека азёр і рэк. Разглядаючы іх адлюстраванні, жыхары і госці краіны могуць захапляцца непаўторнай прыгажосцю Беларусі. Альбом «Беларусь сінявокая» не толькі знаёміць з хараством прыродных скарбаў Беларусі — ён увекавечыў іх зменлівыя рысы для наступных пакаленняў. Кніга можа быць выдатным экскурсаводам, даведнікам і падарункам.

Альбом «Беларусь сінявокая» — выданне, якое распавядае пра ўнікальную прыгажосць вобразаў вады, сіне-блакітных колераў і вадаёмаў Беларусі. Дэманструе, што хаваецца за гучнымі метафарамі «Сінявокая Беларусь» і «Край блакітных азёр», якія сталі сапраўдным народным брэндам.

За альбом «Беларусь сінявокая» атрыманыя наступныя ўзнагароды:
• «Залаты фаліянт» пераможцы Нацыянальнага конкурсу «Мастацтва кнігі» у персанальнай намінацыі «Майстэрства – Найлепшы фотамастак» — за аўтарскую фотаздымку;
• «Залаты фаліянт» пераможцы Нацыянальнага конкурсу «Мастацтва кнігі» у намінацыі «Фотапогляд».
• Спецыяльны дыплом Х міжнароднага конкурсу «Мастацтва кнігі» дзяржаў удзельніц СНГ намінацыі «Арт-кніга».
Вялікі альбомны фармат 38х25 см, 320 старонак, 305 фотаздымкаў, на беларускай, ангельскай і рускай мовах. Ёсць палепшаная версія ў футарале і са срэбраным зрэзам блока.

Альбом «Беларусь сінявокая»
Аўтар: Дзяніс Раманюк