Кніга ў даступнай форме апавядае пра працэс станаўлення чалавека, яго распаўсюджання па зямным шары, пранікнення і рассялення на тэрыторыі Беларусі. Чытачу прыводзяцца самыя апошнія дадзеныя, атрыманыя археолагамі краіны падчас раскопак найстаражытнейшых помнікаў, якімі з’яўляюцца археалагічныя стаянкі старажытных людзей каля вёсак Бердыж і Юравічы. Аповяд вядзецца з улікам цеснай сувязі чалавека і навакольнага асяроддзя ў кантэксце агульнапланетарных прыродных з’яў, а магчыма, і катаклізмаў, якім быў, напрыклад, ледніковы перыяд. Паводле апошняга перапісу насельніцтва, у Беларусі цяпер пражывае каля 9,5 млн чалавек. Але ж адкуль з’явіўся першы чалавек на нашай зямлі? У якіх умовах ён жыў? Чым займаўся, як апранаўся, чым харчаваўся???

Зразумела, што чалавек на тэрыторыі Беларусі з’явіўся не выпадкова і прыйшоў не на пустое месца. Кніга распавядае аб тым, на якім этапе развіцця Зямлі адбылося гэта найважнейшая падзея. Багата ілюстраваная кніга будзе цікавай не толькі школьнікам, але і ўсім, хто цікавіцца гісторыяй сваёй краіны.

Серыя “Беларуская дзіцячая энцыклапедыя”.

Аўтар А. Г. Калечыц. Выдавецтва “Беларуская энцыклапедыя імя Петруся Броўкі”, 2015 г., 120 старонак, цвёрды пераплёт.