Надышлі Дзяды. І вельмі дарэчным ёсць з’яўленне як раз у гэтую пару нашага новага прынта “Матылёк”.
Існуе ўяўленне, што на Дзяды душы продкаў прылятаюць на святло роднай хаты ў выглядзе матылькоў. Іх прылёт на дзядоўскую вячэру – чаканы і добры знак.
Сімвалічна матылёк увасабляе адраджэнне і новае жыццё. У народным светапоглядзе ён выступае істотай значнай і таямнічай. І, сапраўды, ня кожны ў сваім жыцці натуральным чынам цалкам змяняе сваё аблічча, нібыта нараджаючыся двойчы.
Матылёк успрымаецца тагасветнай істотай, звязанай і з небам, і з зямлёй, якая валодае таемнымі ведамі. Таму невыпадкова, што вядомы разнастайныя народныя прыкметы і варожбы па палёце матылька. Гэта яскрава кажа пра яго прадказальніцкія здольнасці.
Ня менш значным ёсць уяўленне пра матылька як пра боства ўрадлівасці і дастатку Спарыша. А калі ўзгадаць, што Спарыш (Спорнік) дзе-нідзе лічыцца дамавіком і апекуном сям’і, то атрымліваецца, што нашы продкі ў выглядзе матылька дапамагаюць і спрыяюць нам, сваім нашчадкам, ва ўсім ня толькі на Дзяды, але заўсёды.
Запрашайма і частуйма сваіх дзядоў! А тых Дзядоў, якім няма да каго ісці, таксама запрашайма і частуйма!
Хай ўсім нам Дзяды спрыяюць!