Аб’ёмная паштоўка “Каляды”

15.00 руб.

У наяўнасці

Катэгорыя:
Калядныя святы немагчыма ўявіць без незвычайных гасцей, якія ўвечары імкнуцца завітаць да ўсіх, каб павіншаваць і прынесці тое, пра што марыць кожны ў гэты чароўны і святочны час.
Каляднікаў чакаюць, запрашаюць, адорваюць і развітваюцца ў спадзяванні сустрэцца налета, бо вялікае шчасце – прымаць іх у сваім доме. Паводле нашага звычая ў таго, хто годна сустракае, ласкава прымае і добра частуе калядных гасцей, у доме будзе лад і дастатак увесь год. Спаткаць каляднікаў – гэта значыць сустрэць сваю долю.
Вядомым калядным сімвалам з’яўляецца зорка, са з’яўленнем на небе якой у народнай традыцыі звязваецца пачатак святкавання. Ёсць розныя меркаванні, што гэта за зорка, якая загараецца першай. Дзесьці кажуць, што гэта Вечарніца (Венера), дзесьці – Каза (народная назва зоркі Capella ў сузор’і Вознік), якая самая высокая і вельмі яркая зорка на калядным небе. А хтосьці мяркуе, што гэта ўвогуле не зорка, але сонца, якое перанараджаецца на зімовае сонцастаянне, пасля чаго пачынае расці дзень. Як бы тое ні было, гэта сімвал святла, якое праганяе цемру і дае надзею.
Свет вялікі, а святочны час кароткі, таму не заўсёды каляднікі могуць паспець  да кожнага. Але ў такім выпадку перадаць шчырыя віншаванні і зычэнні можа калядны гурт у нашай паштоўцы. Кожны вобраз мае свой сімвалізм і перадае пэўныя пажаданні. Дзед узначальвае гурт і з’яўляецца сімвалічным увасабленнем Бога, які ў выглядзе старца вандруе па зямлі, вучыць і судзіць людзей, надзяляе доляй. Дзед таксама ўвасабляе агульны вобраз продкаў, якія спрыяюць сваім нашчадкам і ахоўваюць іх. Каза найчасцей сустракаецца сярод каляднікаў. Звычайна яе водзіць Дзед. Яна сімвалізуе непазбежнае адраджэнне прыроды пасля зімы, а таксама ўрадлівасць, прыбытак і багацце. Бусел – святая птушка для беларусаў. У народзе сцвярджаюць, што бусел прыязны да людзей і служыць прыкладам сямейнай вернасці, прыносіць шчасце. Птушка таксама з’яўляецца сімвалічным пасярэднікам паміж светам чалавека і нябеснымі сіламі. Мядзьведзь з’яўляецца ўвасабленнем сілаў дзікай прыроды, з якімі трэба дамовіцца, каб жыць у ладзе на наступны год. Вобраз мядзьведзя ў калядным гурце сімвалізуе здароўе, сілу, плоднасць і багацце.
Няхай усё гэта будзе з вамі сёлета ды будзе добрай доля!
Май усяго даволі, а бяды ніколі!
Майстар / Вытворца

Матэрыял

Кошык

0

У кошыку пакуль нічога няма.