“Ішлі-пашлі калядоўшчыкі, калядуючы, гуляючы!” Ці чакаеце Святых вечароў, ці рыхтуецеся сустрэць калядных гасцей? Толькі раз у год у самы цёмны час зімовага сонцавароту яны ходзяць па зямлі і нясуць людзям долю. Хто іх годна сустракае, прымае ласкава і добра частуе, той будзе жыць у ладзе і дастатку ўвесь год.

У кожнай мясцовасці можна ўбачыць разнастайныя вобразы калядоўшчыкаў, кожны з якіх мае свой сэнс.

 Дзед узначальвае гурт гурт калядоўшчыкаў і з’яўляецца сімвалічным увасабленнем Бога, які ў выглядзе старца вандруе па зямлі, вучыць і судзіць людзей. У калядках спяваюць пра Бога на падворку гаспадара сядзібы, да якога прыйшлі калядоўшчыкі. Таксама разам з Дзедам часта ходзіць яго пара – Баба. Між іншым, знакі на іх, якія ў арнаменце часта сустракаюцца ў пары, як лічыцца, значаць менавіта “дзед” і “баба”.

 Баба разам з Дзедам адлюстроўваюць продкаў, якія спрыяюць нашчадкам, і прыходзяць у госці ў адпаведныя дні. На першую калядную куццю ў многіх мясцовасцях Беларусі на вячэру запрашалі дзядоў. Вобразы дзеда і бабы сімвалізуюць плоднасць і ўрадлівасць, сямейны лад 

 Каза найчасцей сустракаецца ў гурце калядоўшчыкаў. Звычайна яе водзіць Дзед. Каза сімвалізуе непазбежнае адраджэнне прыроды пасля зімы, а таксама ўрадлівасць, прыбытак і багацце. А яшчэ “Каза” – гэта народная назва зоркі Capella ў сузор’і Вознік. Яна самая высокая і вельмі яркая зорка на калядным небе. Дзе-нідзе кажуць, што з’яўленне на небе “Казы” ёсць знакам пачатку каляднай вячэры 

 Бусел – святая птушка для беларусаў. У народзе сцвярджаюць, што бусел прыязны да людзей і служыць прыкладам сямейнай вернасці. Птушка з’яўляецца сімвалічным пасярэднікам паміж светам чалавека і нябеснымі сіламі. Традыцыйнае разуменне сувязі бусла са светам продкаў разам з уяўленнямі, што ён прыносіць прыносіць дзяцей, абумовілі прысутнасць вобраза бусла сярод калядоўшчыкаў.

 Воўк і  Мядзведзь з’яўляюцца ўвасабленнямі сілаў дзікай прыроды, з якімі трэба дамовіцца, каб жыць у ладзе на наступны год. Вобраз мядзведзя ў калядным гурце звязаны з ідэямі здароўя, сілы, плоднасці і багацця. Воўк сімвалізуе шанцунак і поспех. “Воўк яму дарогу перабег” – так кажуць пра таго, каму вельмі шанцуе. З часоў сярэднявечча вядома павер’е, што калі воўк каму-небудзь перабягае дарогу – гэта прадракае шчасце.

Дызайнер: Марыя Станкевіч