Традыцыйнае абрадавае саламянае ўпрыгожванне, вядомае ў народзе пад назвай “павук”, якое першапачаткова рабілася да Калядаў і Вялікадня, у сучасным свеце паступова набывае новыя ўвасабленні, якія, аднак, захоўваюць свой сімвалізм.

 Сэнс вобраза “павука” звязаны з міфалагічнымі сюжэтамі пра стварэнне свету. У ім адлюстроўваецца сімвалічная мадэль светабудовы. Правільная форма, прамыя лініі і сіметрыя “павука” сімвалізуюць першапачатковы ідэальны нічым не парушаны свет. Паводле традыцыйных уяўленняў, “павук” суадносіцца з небам, Выраем. Гэта той ідэал, якога імкнуцца дасягнуць людзі ў сваім жыцці. Прыгожыя геаметрычныя структуры прыцягваюць увагу, заварожваюць і выклікаюць адчуванне чароўнага.

 “Павук” увасабляе лад, а яго стварэнне і сузіранне настройвае на абнаўленне, спакой і парадак.

Сёння традыцыйныя вобразы набываюць новыя формы і вяртаюцца ў наша жыццё. Гэты сімвал звязвае нас са спадчынай тысячагоддзяў, усведамленне і асэнсаванне якой дае надзейнае апірышча, што так неабходна ў вірлівым сучасным гарадскім жыцці.