Тэхналогія друку: шаўкаграфія
Дызайнер: Тодар Кашкурэвіч

Гэты прынт – аўтарскае ўвасабленне вобразаў Бая і яго сабак, Стаўры і Гаўры. З паданняў мы ведаем, што Бай – першы чалавек на зямлі і першы уладар (князь). Ён з’явіўся амаль адразу пасля стварэння свету, пасля таго як Пярун стрэламі з каменя высек тры іскры (белую, жоўтую, чырвоную), што трапілі ў пракаветныя воды, што стала зачынам светатварэння. У тутэйшай традыцыі Бай з’яўляецца культурным героем, які першым “стаў заводзiць свае чалавечыя парадкi” і ўсталяваў адзін з памінальных абрадаў

Увосень дагэтуль дзе-нідзе ў вёсках Докшыцкага раёна Віцебскай вобласці спраўляюць Стаўроўскія Дзяды і можна пачуць, як продкаў запрашаюць на вячэру словамі: “Стаўры, Гаўры, гам!”, “Стаўры, Гаўры, гам, прыхадзіце к нам!”.

 Пра яго распавядаюць, што ён быў магутным асілкам, любіў паляваць у пушчах на дзікіх звяроў і меў два любімых сабакі незвычайнай моцы, якіх звалі Стаўры (што значыць “магутны, моцны”) і Гаўры (“калматы”).

Бай лічыцца першапродкам беларусаў, нашым агульным дзедам, бо, паводле падання, яго малодшы сын Белаполь стаў родапачынальнікам беларускага этнасу. Згодна з лягендай, ад слядоў сабак паходзяць рэкі Дзвіна і Дняпро, на землях паміж якімі пасяліўся беларускі народ.

 Бай пакінуў загад шанаваць сабак пасля смерці, што стала пачаткам звычая ладзіць Стаўроўскія Дзяды. Сам Бай быў першым смяротным, які стаў апякаць царства памерлых, а Стаўры і Гаўры вартуюць той свет і шлях туды. Два сабакі-вартаўнікі Вырая вядомы і ў беларускіх казках.

Імя Бай па сутнасці значыць “Падвоены”, “Блізнюк”, а сам вобраз адносіцца да кола індаеўрапейскіх блізнечных міфаў пра першых людзей. Стаўры і Гаўры таксама з’яўляюцца тутэйшым ўвасабленнем індаеўрапейскай міфалагемы пра сабак, што ахоўваюць іншасвет, і іх гаспадароў, якія там уладараць: індыйскі Яма (“Блізнюк”) і яго два чатырохвокія сабакі (імёны якіх значаць “Плямісты” ды “Чорны”), іранскі Йіма (“Блізнюк”) і яго чатыры сабакі, грэцкі Аід і трохгаловы Кербер (“Плямісты”), скандынаўскі вялізны і чатырохвокі сабака Гарм.