Дзяніс Раманюк: “Кожная бажніца па-свойму ўнікальная і маляўнічая – таксама як і прырода. Безліч непаўторных спалучэнняў каменю, дрэва, фарбаў – уласціва абодвум. Яшчэ да пачатку ўзвядзення храма архітэктары падбіралі для яго самыя прыгожыя месцы. Мінаў час будаўніцтва, і навюткія вершаліны ўздымаліся вышэй за стрэхі ды шаты дрэў. Але будынак храма ніколі не перашкаджаў наваколлю і не дамінаваў над ім — яны заўсёды гарманічна спалучаліся і дапаўнялі адно аднаго. Так храмы сталі неад’емнай часткай беларускага краявіду.

Лічу, што з выявай святыні краявід становіцца асаблівым. І гэты бліскучы дуэт, пад акампанемент мастацкай фатаграфіі і падрабязных апісанняў, загучаў у новай кнізе. На яе старонках сабраны прыклады ўнікальнай архітэктурнай спадчыны з розных куткоў Беларусі, якія выглядаюць надзвычай эфектна на фоне маляўнічых відарысаў. У кнігу былі адабраны найлепшыя фотаздымкі з адлюстраваннямі храмаў у краявідзе, якія стваралісь на працягу 20 гадоў. Многія бажніцы за гэты час былі адрэстаўраваны і сталі яшчэ прыгажэйшымі, некаторыя, на жаль, страчаны, а іншыя — сапсаваны сучаснай  “рэстаўрацыяй ды рэканструкцыяй” …

У кнізе змешчаны 152 фатаграфіі, на якіх адлюстраваны 86 храмаў і мноства краявідаў — як са знакавых, так і менш вядомых куткоў нашай Радзімы. Кожны здымак храма суправаджаецца падрабязным апісаннем, складзеным з дзвюх частак. У першай частцы, падрыхтаванай вядомым гісторыкам архітэктуры Сяргеем Харэўскім, пададзена дакладная навукова-гістарычная інфармацыя. Другая частка — лірычная, ад фатографа. У ёй Дзяніс Раманюк распавядае пра тое, што засталося па-за кадрам, ды пра ўласныя пачуцці і ўспаміны, звязаныя са стварэннем кожнага фотаздымка.

Альбом выдадзены ў шыкоўным гарызантальным фармаце 300×240 мм і складаецца са 192 старонак пад цвёрдай вокладкай. Зроблена і падарункавая версія — у футарале з залатым абрэзам блока.

Альбом узнагароджаны Гран Пры LIX Нацыянальнага конкурсу «Мастацтва кнігі – 2020» і Дыпломам імя Францыска Скарыны.

Фота, тэкст i мастацкае аздабленне – Дзяніс Раманюк.

Гістарычная даведка – Сяргей Харэўскі.

Выдавец: Дзяніс Раманюк, 2019 год, 192 старонкі, на беларускай, рускай і англійскай мовах, цвёрды пераплёт.

ISBN 978-985-90398-6-7.